過往有唔少研究都指出，大部份女性都有扮高潮嘅經歷，而絕大多數嘅原因，都係出自「照顧男伴自尊」。而近日一個研究就進一步指出，所謂「男性自尊 (masculinity)」唔單止係令女性扮高潮嘅原因之一，更會令伴侶之間嘅溝通出現問題。

由美國南佛羅里達州立大學研究員Jessica Jordan領導嘅團隊，日前於科學期刊上發佈一個關於女性能否誠實與伴侶就性事溝通嘅研究。該研究共分成三部份，首先搵黎157名成年異性戀女性回答關於性生活嘅問卷，結果發現收入比男伴高嘅女性，有高一倍嘅機率於床上假扮高潮；另外兩個研究就發現如果女性越認為男伴嘅「雄風 (Manhood)」係「脆弱的 (precarious)」，佢哋對於與男伴就性事嘅溝通就會越焦慮、溝通亦會更差，從而導致性滿足度及高潮數下跌 (亦即係點解佢哋要扮高潮)。Jessica Jordan總結指：「女性以佢哋認為嘅另一半需要，而非佢哋自己嘅需要及滿足為先。」

值得留意嘅係，Jessica Jordan強調，即使因為「女性照顧男性自尊而犧牲自己嘅滿足及溝通」，都唔代表咁係男性或女性做錯事。Jessica指出如果女性認為自己需要保護男伴嘅尊嚴，咁佢隱瞞自己嘅真正感覺與需要「係一件合理嘅事」；同樣道理，如果男性根本就唔知女伴「因為覺得要保護男性尊嚴而收收埋埋」，咁佢亦冇機會向女伴表明自己其實係想了解對方嘅性需要——亦代表住雙方於性方面嘅溝通失效。

所以問題其實係來自「男士必須有雄風去滿足女性」呢個傳統思想之上。正如Jessica所言「如果社會製造一個無可能維持到嘅雄風標準，不論男女都唔會有贏家。」

資料來源：Do Women Withhold Honest Sexual Communication When They Believe Their Partner’s Manhood is Threatened?