如果要數最多男人講過嘅大話，我相信就係「我已年滿18歲」——講真大家細個偷偷上咸網就一定見過呢啲警告頁面，你又幾可真係會諗「呀我未夠18歲喎」然後好誠實咁撳「離開這個網站」？就算你實際上得8歲，嗰一刻你都會認係18歲啦！不過未來嘅英國少年們，可能就冇辦法再講呢個大話。因為英國近日推出新法案，要求所有成人網站推出更嚴格嘅年齡認證。

喺一篇名為「領先世界嘅防止小童接觸網上成人內容規例」嘅公告中，英國政府話目前網上有太多、太容易得到嘅成人內容，為咗「防止小朋友睇到啲小朋友唔應該睇到嘅嘢」，於是宣佈推出網上安全法案，要求所有成人網站，包括用家影片分享網 (即係Pornhub嗰類)，加入信用卡認證或者第三方服務等「強而有力」嘅年齡認證，確保只有18歲或以上人士先可以進入該網站。假若違反規定，該網站將會面臨最高等於其全球營收10%嘅罰款，以及禁止於英國營運。

新法例嘅原意可能係好嘅，但外界就認為年齡認證可能會產生更大嘅問題。例如使用信用卡認證，就代表用家要將信用卡資料交界成人網站，即使法例要求成人網站「不應處理及儲存與年齡認證無關的資料」、成人網站又可信，但萬一資金保護不足，都可能造成用家個人資料外洩。

另外亦有人質疑年齡認證嘅成效，認為只要年輕人想上咸網，佢就一定會搵到辦法解決年齡認證 (例如偷阿爸嘅信用卡資料)。

資料來源：gov.uk、IFLScience