唔知大家有冇經歷過以下呢個情況，你本身已經有一部電話，佢冇壞、冇爛，甚至其實你幾滿意佢，但自己有部新電話出咗之後，你就突然覺得依家呢部又慢、個Mon又細、影相又唔靚，突然就唔換電話都唔得，基本上即係俗語講嘅「隔離屋飯香」。而近日就有一個研究，證實「隔離屋飯香」於感情上一樣會出然，而且只要面對一個新嘅追求者，就會立即認為原本呢個唔好。

來自以色列Baruch Ivcher心理學院嘅Gurit Birnbaum，為咗研究「撬牆腳 (英文學術名稱叫Mate Poaching)」呢個行為而做咗兩個研究。第一個研究中，佢搵黎一班本身已經有另一半嘅人，然後要求佢哋與研究團隊中一個外表出色嘅成員進行網上對話，而團隊成員講嘅嘢其實係預先寫好，除咗有一般對話之類，仲有「你鍾意去邊旅行？我都係呀，我哋應該一齊去」、「你內在同外在都一樣咁靚」等「挑逗性」對話；而對照組就只係有一般對話。完成對話後測試者要進行一個能夠評定佢哋對於現任伴侶觀感及不滿嘅測試。結果發現相對於只接收到一般對話嘅對照組，「被挑逗組」更傾向對現任伴侶不滿。

而另一個研究，就搵返「被挾逗組」嘅人，再要求佢哋紀錄於該場網上對話後嘅性幻想對象，特別係幻想對象究竟係現任伴侶，定係「新追求者 (即係個研究團隊成員)。結果就發現「被挑逗組」唔單止會認為現任冇咁好，更對「新追求者」有更高慾望。

結論就係，面對「新追求者」，即使只係「網上誘惑」，都足降低人們對於現任嘅愛，繼而可能影響段關係，以至出軌等行為。但Gurit Birnbaum亦指出，研究證明單純嘅外表吸引力，並唔足以產生出軌問題，即係你喺IG睇好多、Follow好多靚女唔代表你一定會出軌，但如果對方好主動呢，你嘅抵抗力其實比起想像中要差。同時亦證實社交媒體對於人際關係嘅負面影響。