唔少人都試過同某人拍拖之後，先發現對方原來係個渣男，又或者有不可告人嘅黑歷史，我甚至識得有人每逢遇到有機會嘅對象，都會上網Google佢個名，睇下搵唔搵到關於對方嘅「負評」。而美國近來就出現咗一個「渣男資料庫」，供一眾女生上傳前男友嘅「賤績」，雖然某程度上的確能夠幫助女仔避開渣男，但就引起網民討論相關嘅道德議題。

圖片：Girlpowergirlstrong.com

據外媒報導，呢個名為「Ex-Boyfriend List」嘅網頁係由一名身在美國嘅女性Tracy Teagan所成立，其原理非常簡單，就係開放予所有申請咗用戶嘅網民投稿，講述佢哋遇過嘅渣男有幾渣；而其他用家就可以透過搜尋姓名黎搵下自己嘅對象是否曾經被提及，從而了解對象嘅過去，避開渣男。

據Tracy Teagan接受《Dailymail》訪問時指，成立網站嘅原因係佢見到一名親友經歷過一場慘痛嘅離婚，而佢本人亦曾經遇過出軌嘅男人，對其造成「一生中最嚴重嘅創傷」，於是佢想搵一個地方發洩兼尋找同路人。

圖片：Girlpowergirlstrong.com

目前網站上已經有接近500篇投稿，換言之有500名男士被呢個網站——準確啲係被呢個網站嘅用戶標籤成「渣男」。網站要求投稿者必須提供前男友嘅姓名以及所在州份、地區，但就禁止列出前男友嘅電話、地址、工作地點等個人資料，「除非你想被Ban」。但其註冊過程極為簡單，只係需要一個普通電郵地址就可以，投稿前亦冇需要做任何驗證、甚至唔需要為投稿內容提供任何證據。報導指出網站會透過投稿下方嘅 (反對) 留言決定投稿是否真確，但驟眼所見絕大部份投稿都冇任何留言。簡單啲黎講就係任何人都可以投稿盡情唱衰任何人。

況且感情之事素來極度主觀，旁人根本無法單靠一家之言了解事情真相；況且亦可以想像有人會因為睇唔順眼某人而投稿，希望達至「社會性謀殺」之效。所以有關報導出街之後，網民對於「渣男資料庫」嘅睇法非常兩極，有人認為能夠幫助女性避開渣男，但又有人認為資料庫只會成為女性「圍爐批鬥男人」嘅地方。

資料來源：Dailymail