憑著性感直播、甚至開創出「浴缸直播」嘅美國性感實況主「Amouranth」，上週突然於直播中自爆已經結婚，並且遭到對方精神、言語虐待，對方更威脅要拎走哂佢所有錢、殺死佢隻狗，令Amouranth於直播中聲淚俱下。

卻說Amouranth於上週六進行直播，直播一開始見到佢通過電造，同一名男子爭吵。Amouranth質問對方點解話要殺死佢隻狗，以阻止Amouranth進行24小時直播；而男方就認為Amouranth誣蔑佢，更因女方不停打斷佢發言而變得非常暴躁，聲嘶力竭地喝罵Amouranth，並要求佢執包袱離開。期間二人嘅對話越見激動，從對話中推測二人早前已經有過爭執，男方更曾推倒Amouranth以搶奪其手機，最後Amouranth報警 (男方稱為Swatting，即報假案)。

回到直播當中，男方揚言會用Amouranth嘅Twitter，發佈「我係Amouranth老公，佢家暴我」之類嘅帖文，「摧毀一切 (即一拍兩散)」，並指Amouranth嘅成功係「我為咗適合嘅人而建立」。

二人於直播中爭執近20分鐘後，男方先發現Amouranth正在直播，而且Amouranth不肯再接聽佢嘅電話，所以轉為用訊息威脅女方。而女方亦於直播中嘲諷男方「你想我同人講我單身？我依家就係啦……反正你條L咁細！」

圖片：Amouranth on Twitter

隨後Amouranth於直播中承認自己已經結婚，而剛才於電話爭執嘅就係佢老公。佢指出自己之所以一直對外聲稱單身，係因為男方認為公開結婚事宜會影響Amouranth嘅「商業模式」，甚至Amouranth之所以會成為「浴缸直播主」，都係因為老公脅迫。及後佢亦於直播中公開對方嘅訊息，當中可見男方曾因Amouranth冇跟佢嘅計劃進行直播而辱罵女方做「Dump Fuck」。而另一組訊息中，男方威脅Amouranth聽電話，否則就將佢嘅行李掉出窗、刪掉Amouranth嘅社交媒體、購買即將到期嘅期權「消滅現金」、將數以十萬計嘅美金捐出去、以及將Amouranth隻狗送去屠宰場。

事件爆出後引起美國網絡高度關注。而Amouranth亦於日前進行新直播，指出佢老公目前已經「離開並尋求協助」，而佢亦拎返哂自己所有社交媒體及銀行帳戶，目前佢自己亦尋求緊「情緒及法律支援」。據Amouranth指，事情嘅轉機係佢將二人爭執嘅直播畀返男方睇，男方「首次知道自己原來咁賤格」，所以先放過佢。於直播中Amouranth亦引用《哈利波特》中嘅對白指：「多比自由了」，同時指出終於可以唔露乳溝、著正常衫直播，似乎代表未來都會封胸。