自從上次同大家報導過日本出現「剪裙非禮」嘅痴漢後，我就有特別留意日本仲有冇其他「新型痴漢」，結果近日就再發現一單充滿話題性嘅日本偷拍新聞。不過有趣嘅係，呢單新聞嘅特別之處並不在於犯案手法，而在於犯案者嘅身份同「喜好」。

卻說上月尾時，日本名古屋警方拘捕咗一名男子，佢涉嫌於鞋頭安裝小型攝錄機，並於一間超市中偷拍一名女子裙底。講真「鞋頭藏Cam」呢個犯案手法並不新奇，記憶中香港都曾經出現過類似嘅手法，但整單案除咗呢點之外，都可謂「糟點」滿滿。

首先，據日本警方指出，犯案者係一名64歲嘅大學生——你冇睇錯，我冇打錯——據知犯案者早年已經退休，然後就決定重返校園進修，目前已經係一名大學四年級生。而作為一名「大學生」，明明身邊就有青春少艾嘅女大學生，但佢嘅犯案對象就係一名34歲嘅街頭輕熟女。而據報呢名偷拍34歲女子嘅64歲大學生，喺被捕一刻火速將存有偷拍片段嘅SD卡咬碎並且吞咗落肚，但當警方開始提問時，佢又直接承認犯案。

報導一出，日本網民笑稱呢單新聞「資訊量太大」，當中絕大部份人都聚焦於犯案者嘅「64歲大學生」身份，有人指明明64歲都仲有求學之心係一件好值得尊敬、學習嘅事，但你又走咗去偷拍裙底搞到我好矛盾；又有人諷刺呢位大學生讀嘅係「女性的奧秘」又或者「偷拍專業」；亦有人指犯案者又讀大學又偷拍，比起真正嘅年輕人都仲要青春。