任何人都唔希望另一半出軌，但為咗阻止事情發生，你又願意去到幾盡？根據外媒報導，美國近年出現一個「主動勾引捉奸服務」，喺接到女士們嘅要求後，就會主動去勾引佢咃嘅男人，並從男人嘅反應斷定對方有冇出軌嘅可能。各位男士又點睇呢種「釣魚執法」行為？

據新西蘭媒體《Newshub》引述《South West News Service》報導，一名現年30歲嘅美國女子Madeline Smith近年成立咗一個主動勾引捉奸服務。其服務內容相當簡單，就係接到女方嘅委託後，用社交網站上嘅假帳戶接觸委託人個男朋友或老公，並用盡一切方法試圖勾引對方。如果男方對假帳戶產生興趣就為之「上釣」，佢就會將「罪證」交返畀委託人。

Madeline Smith指，當初佢其實為咗幫朋友試探另一半，所以先開始上網「勾引」男性，但後來發現市面上其實冇類似嘅服務，而佢本人亦鍾意睇捉奸真人Show《Cheaters》，所以就決定將佢變成自己嘅全職工作。

Madeline Smith表示，接到委託之後，佢會先向委託人詢問男伴嘅基本資料、社交平台名稱等，同時亦會詢問委託人想佢哋「去到幾盡」。佢指出，每個女士對於「出軌」嘅定義都有所不同，有人認為男一半覆其他女人嘅訊息就已經係出軌，有人就認為界線係「互傳裸照」。而Madeline亦會因應男方嘅興趣、性格、弱點以及回應而調整自己嘅「勾引」策略。簡單啲黎講就儘可能勾引到個男人為止。

面對呢種「勾引」，Madeline表示男人最好嘅應對方法就係直接封鎖佢。「過關嘅男人通常會話我有女朋友/老婆/未婚妻，而最好嘅方法，就係直接一句『Thank you for reaching out』然後Block咗我。」 同時佢亦指出，有八成個案中，個男人都係出軌慣犯，當中更有唔少係已婚、有小朋友嘅男人。

資料來源：Newshub