「有冇共同興趣」係唔少人搵另一半時嘅重要條件之一，但係咪有共同興趣就可以成為情侶？日本最近就推出咗一個針對御宅族群嘅交友App，標榜能夠幫助宅宅們認識有相當興趣嘅異性，然後發展成為戀人。睇落成個理念非常好，市場上亦有大概有呢個需要，但日本網民就非常唔睇好個App，甚至認為個App嘅宣傳圖已經解釋到點解唔會成功。

呢個名為「オタ恋 (宅戀)」嘅App，最近於日本嘅App Store中上架，其功能與一般交友App冇咩分別，唯一特點就係標榜App入面嘅男女全部都係御宅族，所以非常適合御宅族黎搵有相同興趣嘅另一半。

不過日本網民，即係好可能係個App嘅潛在用家們，就非常唔睇好個App、亦唔認為宅宅們能夠透過個App搵到另一半。網民們話，所謂嘅「御宅族」文化其實相當廣闊，隨隨便便都數到動漫宅、鐵道宅、軍事宅、影視宅、遊戲宅等等等等；就算大家都係動漫宅，鍾意嘅作品種類都可以天差地遠，所以「大家都係御宅族」並唔代表大家有共同興趣。況且如果有共同興趣就可以成為另一半，唔少宅宅老早就於身邊嘅同好團子中搵到，根本唔使用個App。

宣傳圖嘅對話係

「你好！我看了你的個人簡介，我也想進行聖地巡禮呢」

「我也很喜歡，Yuri你最喜歡哪部動畫？」

「好開心喔，不如一起去主題咖啡」。

另外亦有人指出，交友App呢種需要「主動搭訕」又或「被人搭訕」，再順暢地開始交談嘅模式，本身就同宅宅們嘅性格背道而馳。甚至有人指出，個App嘅宣傳圖入面嘅對話，根本就係九唔搭八，大家自說自話，充份證明咗宅宅們嘅交談困難。

如果你自問都係宅宅，你又會唔會想用呢個App呢？