琴日我哋同大家報導過因應美國猶他州推出「年齡驗證新法」，導致Pornhub略帶報復性地封鎖所有猶他州IP一事。當時唔少人都有提出，用VPN/翻牆咪得囉！冇錯，你諗到，一眾身在猶他州嘅男人都諗到，而Google搜尋嘅數據亦顯示，當地嘅「VPN」搜尋數近日有爆發性增長。

《Cultural Currents Institute》分析咗近期嘅Google搜尋數據，發現猶他州人搜尋「VPN」嘅次數近日大幅增加，例如5月2日嘅數據就顯示，猶他州係美國全國最多人搜尋「VPN」嘅州份，而且仲大幅拋離維珍尼亞以及紐約州。而翻睇3月嘅數據，就顯示猶他州搜尋「VPN」嘅程度，喺全美國黎講只算係中等，換言之的確有大量人係因為Pornhub封鎖先想去搵VPN黎用。

值得一提嘅係，猶他州並唔係美國第一個推行「年齡驗證法」嘅州份，例如路易斯安那州亦於今年1月推出類似嘅法例，不過因為該州容許市民利用州政府經營嘅電子錢包「LA Wallet」作年齡驗證，所以方便度及安全性都比猶他州要高，Pornhub亦冇封鎖路易斯安那州嘅IP。

資料來源：Cultural Currents Institute