早前我哋同大家報導過，由於美國猶他州實施年齡驗證新法，導致世界最大成人影片網站Pornhub封鎖整個州嘅IP，並呼籲網民向當地議員爭取改例。而近日隨住阿肯色 (Arkansas)、密西西比 (Mississippi)及維珍尼亞 (Viginia) 都會推出類似法例，Pornhub除咗再次向當地網民呼籲外，更試圖向Apple、Google以及Microsoft三大巨頭求助——你都可以話係想拖埋佢哋落水嘅。

卻說阿肯色、密西西比及維珍尼亞三個州份將於下月實行年齡驗證法，而如果你身處當地嘅話，近日登上Pornhub時就會見到一條由AV女優Cherie Deville拍攝嘅影片，呼籲大家聯絡當地議員遊說改例。不過由於法例老早就已經於三州嘅議會通過，所以即使網民真係聽從Pornhub嘅呼籲，短時間內情況應該都冇改變。而Pornhub發言人回應《CNN》查詢時，就表示仿傚猶他州、封鎖該州IP嘅做法「並唔係我哋嘅目標」，但亦冇否定其可能性，只係話「有需要的話，我哋會於未來數州內分享下一步行動。」

另一邊廂，據《CNN》報導，Pornhub嘅母公司Ethical Capital Partners (ECP) 近日私下與Apple、Google及Microsoft三大科技接觸，希望佢哋能夠聯合建立一個以裝置為本嘅年齡驗證機制。其中一個做法，要三大科技公司利用佢哋嘅作業系統儲存用家嘅個人資料 (年齡)，而當該裝置試圖登上需要年輕驗證嘅網站時，裝置會自動幫用家完成驗證，未成年者當然亦會被自動彈走。

Pornhub之所以會向三大科技公司求助，係因為目前美國各州嘅年齡驗證法，都要求網站 (Pornhub) 自行提供年齡驗證方法，換言之用家需要向網站，或網站聘請嘅第三方公司提供駕駛執照等個人資料，而網站亦需要處理、儲存、管理相關資料。除咗成本上嘅考慮外，更有資料外洩、用家失去匿名身份等潛在問題。

雖然裝置年齡驗證的確能夠 (理論上) 避免上述問題，但其實就係將相關成本轉嫁咗畀科技公司，再加上目前美國對於Pornhub、以至整個成人業界嘅觀感都唔太好，三大科技公司似乎冇咩興趣幫Pornhub手。面對《CNN》查詢時，Microsoft就表示唔會回應，Apple同Google更加係覆都冇覆。

資料來源：CNN