近年唔少歐美國家都以保護年輕人為名，開始收緊對成人內容嘅規範，例如法國、美國多個州份就已經立法要求成人內容平台 (如Pornhub) 對用家進行年齡驗證，甚或有更激進嘅團體認為應該直接禁止成人內容。不過有來自澳洲悉尼大學嘅學者，就表示一刀切禁止成人內容，對年輕人並非好事，更提出六個「健康AV標準」，希望能幫助年輕人吸收「健康」嘅成人內容。

來自悉尼大學藝術、文學及英文學院，並主要研究AV嘅Alan McKee教授表示，目前外界對於AV嘅睇法非常單一，認為所有AV都係一模一樣地不健康、不道德，亦無視坊間有眾多不同類型、不同風格、針對不同觀眾嘅成人內容。同時佢亦認為堵不如疏，一刀切禁止AV就如同當年美國嘅「毒品戰爭 (War on Drugs)」一樣，最終只會失敗。

所以佢認為更重要嘅，係增加年輕人嘅「AV識字率 (Porn Literacy)」，亦即教識佢哋分辨咩係「健康AV」。為此搵黎來自不同界別嘅學者成立專家小組，並提出六個針對18至25歲年輕人嘅「健康AV標準」，包括「包含不同的性行為」、「包含不同的體形、種族、性別」、「畫面有呈現雙方同意」、「道德性的製作 (例如演員自願出鏡)」、「著重所有參演者嘅快感 (而非只著重男士)」以及「描述安全性行為」。佢希望年輕人學跟從以上六個標準去選擇成人內容，並從中學習到更正確嘅性知識及性觀念。

不過McKee教授嘅提議就不被保守團體接受，例如反對「物化女性」以及「性化女性」嘅Collective Shout，其發言人Melinda Tankard Reist就表示，McKee教授提出「健康AV」嘅概念，只係為成人業界「洗白」，佢表示AV觀眾就係鍾意睇粗暴而且貶低女性嘅內容，所以即使有呢啲標準，觀眾都唔會搵「健康AV」黎睇，業界亦唔會有任何改變。

McKee教授自己亦承認，如何定義「健康AV」係一大難題。例如於專家小組中，有人提出健康AV中應呈現「雙方有情感上的親密」，但有人就反駁咁會將「隨意性行為」定義為「唔健康」。同時McKee亦表示，正因為大家認為「隨意性行為」係「壞事」，認為兩性關係就係「相愛、結婚、一夫一妻制」，性愛只係「表達愛又或繁殖下一代」嘅方法，先令過往對於成人內容影響嘅研究變得模糊不清。

資料來源：Guardian