講起「日本風俗」，大家都習慣將其視為針對男性客人嘅成人產業。不過據日本《日刊Spa!》報導，近年日本嘅「女性用風俗業 (女風)」漸漸興起，客人包括家庭主婦、20代前半嘅年輕女性，以至喜歡「NTR」嘅情侶，甚至有傳「人氣YouTuber」以及「前國民偶像」都係常客之一。於是佢哋就搵黎一名半年前開始頻頻光顧「女風」嘅20代人妻，解釋「女風」嘅特色及其吸引之處。

據呢名化名「齊藤めぐみ」嘅人妻表示，佢於幾年前結婚，但近一年都冇同先生有親密行為。佢表示光顧「女風」之前，人生從未去過陪酒等夜店，甚至本來對於從事類似行業嘅男性頗為反感，認為佢哋非常輕浮，亦無法想像第一次同個男人見面就要肉帛相見。

令佢改觀嘅契機，係半年前有位同事提出要帶佢去一間「女風從業員」聚集嘅酒吧，而佢就本住去見識下嘅心情去咗。結果發現酒吧內有各種風格嘅男性，由「王道美男」到「年下犬系」再到「中年紳士」都有，佢哋分別來自唔同嘅店舖，但每次聚埋一齊都係談論「最鍾意嘅體位」、「最拿手嘅係咩」等性相關話題，而且好快就了解到對方嘅個性。

不過佢亦表示，礙於日本風俗法嘅關係，即使你有心儀目標都唔可以直接帶走，所以當日佢雖然心癢難耐，但最後都係返咗屋企。

後來佢就成為「女風」常客，目前每個星期至少光顧一次。佢亦提到，比起外表，女性客人似乎更著重對方嘅內心及性格。例如佢最近就「指名」咗一個外表其實唔係佢鍾意嘅男性，原因係對話之間覺得對方非常「認真」，而去到床上對方亦的確非常認真同有禮貌。齊藤めぐみ表示，當發展到咁嘅關係時，就會不可思議地覺得對方唔錯。

費用方面，120分鐘嘅套餐為20,000Yen，另加1,000Yen指名費及1,000Yen交通，再加上6,000至8,000Yen嘅酒店錢，換言之每次光顧大約係30,000Yen左右。而服務方面就由「AV中常見嘅泡泡浴」開始，沖乾淨後上到床先正式計時，最後會有精油按摩，然後手拖手去到車站分別。佢表示比起「動手」能力，創造令人舒服嘅氣氛以及細唔細心都好重要，其中佢特別讚揚一個使用無香氣精油嘅男性，表示唔使擔心返到屋企會被老公發覺。

值得一提嘅係，目前「女風」似乎係唔包括「本番」服務。因為據《日刊Spa!》表示，近年日本「女風」迎來爆發性增長，唔單止女性客人變多，從業嘅男性更多，所以為咗留住客人，唔少從業員開始偷偷提供本番服務。對此「齊藤めぐみ」表示，雖然聽到消息後的確有啲擔心，但佢過往嘅幾次經驗都無任何問題，所以未來佢都會繼續光顧。佢亦提到目前同先生依然維持無性關係，但佢仍想維持夫婦狀態，再利用「女風」尋求快樂，幫助佢渡過婚姻生活。

資料來源：日刊Spa!