近年世界各國都出現大量性侵案件或糾紛，而當中嘅重點之一，就係雙方是否於「同意 (Consent)」下進行親密行為。但無論關係長久嘅情侶，定只係一夜情對象，大家都好少會開口講出「同意」，更惶論會有白紙黑字嘅實在證明，結果事後產生糾紛時通常都係口同鼻拗，難以定奪。有見及此，日本就準備於今年內推出「性愛同意」APP，希望能夠解決問題。

呢個名為「キロク (Kirok或Ki6，即日文「紀錄」)」嘅APP用法相當簡單，下載完打開後會先顯示由律師監督嘅法律條文，用家需要主動按下同意；而當要發生親密關係時，雙方就可以拎出各自嘅電話，並掃瞄對方手機中「キロク」顯示嘅QR Code，系統會紀錄底雙方當時嘅GPS位置、時間等等。如果雙方之前就曾經同意過，亦可以直接於APP內向對方發送「同意書」，免卻「掃Code」嘅步驟。

主畫面

法律條文 (示範)

顯示QR Code

使用紀錄

換言之就即係用「掃Code」取代難以查證嘅「口講」、「暗示」，又或破壞氣氛嘅「簽字」等動作，令雙方都能得到保障，萬一日後產生糾紛亦可以作為證據使用。目前「キロク」仍處於開發當中，尚需調整有關保護個人資料、以及應對「錯誤同意」以及「被強制同意」等場合嘅方法，預計最終會喺2023年尾推出。

唔知各位又認為呢個APP能唔能夠保障關係雙方？乾柴碰上烈火時仲要拎個電話出黎掃APP又會唔會好掃興？

資料來源：PRTIMES