十年前，當時仲做緊地下偶象成員嘅橋本環奈，因為於台上表演（準確啲講，個表演本身無預佢，但佢堅持要喺台上嘅一角自己跟住跳）時，被台下觀眾拍下超夢幻嘅「奇跡的一枚」而爆紅，目前已經成為日本一線女星。十年後嘅今日，又有一位地下偶像以同樣方式成為日本網絡熱話，甚至有網民認為佢可以成為下一個橋本環奈！

橋本環奈嘅「奇跡的一枚」

中川心

話說日本X（Twitter）用家「なるちゃん@美容」上週於X（Twitter）貼出日本女團「あまいものつめあわせ」成員「中川心」年初公演時被拍下嘅照片，只見相中嘅「中川心」身穿偶像表演服、努力跳舞之餘亦一直露出超可愛表情，令「なるちゃん@美容」驚呼「呢個中川心太似當年嘅橋本環奈了！呢隊女團不得了！」

帖文一出，馬上就成為日本網絡熱話，截止目前為止已經有超過1,290萬次觀看、18萬個Like、1.4萬次轉發。而「中川心」亦火速爆紅。

日本媒體《Sponichi Annex》隨後搵到「中川心」本人，訪問佢對於爆紅嘅感想，中川心則表示自己其實有啲擔心，大家會覺得佢嘅照片同真人有落差，但就好正面地表示自己會於美容及表情方面繼續努力，希望唔會浪費大家嘅時間，亦希望大家會繼續鍾意佢。唔知你又睇唔睇好佢成為下一個「環奈BB」呢？

資料來源：Sponichi Annex