過往曾經有多個研究證實性愛（或高潮）對男女嘅身心健康有正面影響，但究竟做愛要做得有幾密先係最好呢？唔做或者做唔夠又會發生咩事呢？美國明尼蘇達大學近日就公佈咗個最新研究，證實女性做愛次數不足的話，死亡率會增加70%；如果係患有抑鬱症再加做愛次數不足，死亡率更加會增加近200%。

是次研究集中於女性做愛頻密度（一個星期做幾多次）與「全因死亡率（all-cause mortality）」（即包括所有死因嘅死亡率）之間嘅關係。研究團隊利用美國國家健康與營養調查中，近1.5萬位20-59歲美國女性嘅健康數據，分析出佢哋嘅全因死亡率、過去12個月嘅月均性愛次數、是否患有抑鬱、是否肥胖等健康數據，並試圖分析數據之間嘅關係。

結果發現，性愛頻密度較低（每週不足一次）嘅女性，唔單止傾向從不吸煙、有更高嘅教育程度、以及更高嘅抑鬱機率，更重要嘅係體內嘅發炎蛋白（C-reactive protein）含量亦較高，顯示佢哋體內有發炎反應。結果就係性愛頻密度較低嘅女性嘅死亡率，比起每週做愛多於一次嘅女性高70%。如果係患有抑鬱症、同時做愛次數不足嘅女性，死亡率更會比有抑鬱但做愛次數足夠嘅女性高197%。

研究總結指出性愛對於維持心血管健康有重要影響，並呼籲公共醫療系統應該考慮干預（鼓勵增加）女性嘅性愛次數。但值得留意嘅係，研究發現只要做愛次數多於每週一次，就與死亡率再無任何統計學上嘅關係。亦即女性每週做唔夠一次愛死亡率會增加，但做多過一次對健康冇咩顯著好處。換言之「每週一次」就係所謂嘅「Magic number」。

資料來源：Connection Between Depression, Sexual Frequency, and All-cause Mortality: Findings from a Nationally Representative Study