根據Wikipedia嘅定義，「迷信」即係「一般指相信占星、卜筮、風水、命相、鬼神等思想。有時泛指無科學論證基礎的，或盲目的信仰或崇拜」。對普遍接受過現代教育嘅人黎講，「迷信」好可能已經係我哋阿媽嗰一代嘅習慣。但根據一個新研究，其實現今嘅年輕人都係非常迷信，特別係當牽涉兩性感情時，星座更加係有重大影響力！

圖片：EduBirdie

話說美國論文寫作網站「EduBirdie」早前公佈咗一個關於星座如何影響Gen Z（即九十年代中至千禧年代中出世嘅人，大概即係依家嘅大學生）年輕人嘅研究。當中發現有80%年輕人至少某程度上相信星座，當中更有50%係肯定地相信星座。除此之外，72%年輕人表示面對教育、財務、職業等重大抉擇時，會先尋求星座嘅指引，41%年輕人更會去檢查同事或上司嘅星座，睇下大家夾唔夾。

連同事嘅星座都會Check，咁喺選擇另一半時檢查星座就自然少不免。研究發現74%年輕人會檢查潛在對象嘅星座，睇下對方同自己夾唔夾，當中31%表示直頭唔會同星座唔夾嘅對象發展下去。而且你唔好以為一齊咗星座就唔重要呀，事關有21%受訪者表示曾經因為自己嘅星座而被分手；反過來亦有13%人因為伴侶頂唔順佢太信星座而被分手。

圖片：EduBirdie

《New York Post》於報導此報告時，就搵黎約會網站Flirtini嘅「約會專家」Anastasiya Pochotna，為依靠星座選擇另一半嘅人提出建議。專家表示過度著重二人之間嘅星座配唔配合，會阻礙你理解二人之間嘅互動。「如果星座話你比較獨立，問下自己拍拖係咪真係咁，用星座黎搵出習慣，而非預測未來。講到底，最重要嘅都係你嘅行為及溝通，而唔係一個App或者星座師話你個星座係點。星座可以提供啟發，但唔能夠取代你去解決真正嘅問題。」

資料來源：EduBirdie、New York Post