當講起「兩性平權」之時，唔少人都會認為男性作為目前「父權社會」嘅既得利益者，一定唔肯放棄目前享有嘅經濟、社會優勢，改為推動兩性平等。但近日一個新研究指出，其實喺某啲情況下，男性對於社會中嘅兩性經濟不平等比起女性更加敏感，背後原來係兩性經濟不平等，其實係會影響男性婚後嘅生活水準。

AI示意圖

圖片：ImageFX

一群來自香港城市大學、中國南開大學以及澳洲新南威爾斯大學嘅學者近日發表咗一份有關兩性平等嘅研究，並發現比起女性，其實男性更傾向避開兩性經濟不平等嘅社會。團隊先係分析美國50個州份嘅人口普查數據，發現男女收入越不平等（男高女低）嘅州份，處於生殖年齡嘅男人比例就越低；進一步分析人口流動情況，更發現男性更傾向搬離收入不平等嘅州份，換言之男性係主動避開男女經濟不平等嘅生活環境。

團隊以中國大學生為樣本進一步研究，要求佢哋想像於一男女收入不平等狀況或高或低嘅虛構社會中尋找結婚對象，又或者搵工。結果發現被安排於收入不平等社會中尋找結婚對象嘅男性大學生，更傾向表示唔願意生活呢個虛構社會之中。詳細詢問後發現背後嘅原因，係男性認為於收入不平等嘅社會中結婚之後，自己嘅生活水準會大幅降低——即係本來份糧自己一個用，結咗婚之後要養埋另一半；反之女性就認為自己嘅生活水準會有所提高。

AI示意圖

研究指出，於男女收入不平等嘅社會中，男性於擇偶時會面對更大競爭，最終遇上收入與自己差距更大嘅另一半嘅機率會大大提高，換言之婚後嘅生活水準下跌就會更明顯。而女性就恰恰相反，會有更高嘅機率遇上收入比自己高嘅另一半，生活水準得以提升。換言之，當討論緊「婚後生活」時，女性其實比起男性更傾向選擇一個男女收入不平等嘅社會，以尋找能夠提升自己生活水準嘅男性。

資料來源：Men (but not women) prefer to live in economically equal societies when it comes to mating: A five-study investigation