《Assassin's Creed（刺客教條）》出電影已經唔係咩新鮮事，好多捧場客一早都知，Mean娜雖然淨係玩過《Unity》呢一集嘅2x%（我覺得都幾難玩……），冇Follow前面嘅集數例如《Black Flag》等等，但《刺客教條》喺打機界中有一定名氣，所以點都要留意下佢有咩搞作。呢套改編自Ubisoft遊戲「刺客教條系列」嘅電影，由Justin Kurzel執導，Michael Fassbender一人分飾兩角，分別係身處現代嘅Callum Lynch，以及 15 世紀嘅「刺客」先祖Aguilar。

故事敘述職業罪犯Callum察覺自己係刺客組織嘅後裔，被迫參與測驗去進行深層記憶探索，以便重溫祖先闖盪西班牙宗教裁判所嘅經歷。Callum喺探索過程中，必須獲得知識同技能，以面對聖殿及存於現今嘅敵人。

基本上電影嘅設定同遊戲頗為接近，仲會出現遊戲中嘅經典動作︰刺殺、戰鬥、攀爬，以及最令人期待嘅「Leap of Faith」。相信唔少玩《刺客教條》嘅人，都會被佢嘅場面震撼，爬上塔頂遠眺時真係好鬼宏大，之後再嚟個「Leap of Faith」跳落草埋，硬係有種快感，Mean娜玩嘅時候成日失驚無神爬到勁高睇風景，再一嘢跳返落黎，係幾無聊，但畫面確係幾好睇（不過同一場境出現5,000個NPC群眾，啲畫就頗為粗糙），唔知電影係咪可以做返咁正嘅動作效果呢？

電影預計12月左右上映，心急想快啲睇？即刻畀返啲劇照同預告片過你啦！