如果是冬天去旅行，尤其去日本的時候，我都會盡量搵些溫泉酒店做中途叉電站，浸一浸天然的高熱溫泉水，或者於澡堂按摩池鬆一鬆，直至浸到上腦你都不想離開如此舒服的環境。世界之大，原來不單日本，連Iceland冰島班男人都極之識嘆，日前當地首間Beer Spa正式開幕，提供9個indoor、2個outdoor暖啤酒池俾大家浸!

這個Beer Spa叫做Bjórböðin，池中啤酒是暖的 (否則冰天雪地一定凍死人)，大約38°C比大家的沖涼水熱少少，混和了啤酒、水、啤酒花與酵母，所以成個池都係淡淡的金黃色，兼且有自然的泡沫。官方聲稱Beer Spa有益於皮膚、毛髮與整體健康，建議遊客們可以先浸25分鐘啤酒，再去用25分鐘鬆一鬆，咁就舒服哂。

不過，Beer Spa的啤酒池水是不能飲的，再強調，是Undrinkable，想飲啤酒的可以在隔離的一個Beer Tap斟出冰凍的Kaldi Beer，冰島上歷史最悠久的小型啤酒廠。官方建議大家浸完之後等幾個鐘先沖涼，不過陣味難唔難頂就見仁見智了。

Iceland不是第一個做Beer Spa的國家，這個重口味活動於捷克、斯洛伐克、德國等地己經頗有人氣。雖然睇落有少少難接受，但若果飛歐洲，人一世物一世，你無理由唔試一試佢掛?