男人戴貴錶係地位象徵，亦代表我哋對機械構造嘅推祟，但心底裏總有個大細路嘅我哋，有時都想擁有一隻純粹「好玩」嘅錶滿足自己。而如果你鍾意玩大富翁同GTA，咁以下呢兩隻由Undone X Monopoly，再Featuring 美國畫家Stephen Bliss嘅Moneyman系列就應該啱你啦！

咁又有咩咁特別呢？首先留意兩隻錶上嘅「大富翁叔叔」唔再係善男信女，恤衫之下著住避彈衣，手上亦拎住兩把「美金槍」。「The Benjamin」靈感來自$100美金，米黃配綠正正就係美金嘅顏色，個名亦係指$100美金上嘅人像，美國前總統Benjamin Franklin。錶面上以Monopoly嘅註冊編號「偽裝」成美金的記認號碼，下面嘅簽名就唔係美國財長，而係Stephen Bliss本人嘅簽名。「The Godfather」就走黑金幫會風，相較「The Benjamin」低調得多，低調到個「大富翁叔叔」射緊出黎啲銀紙，係刻上去兩個小盤錶之上，要以特定角度先睇到。機芯方面就用上Seiko出嘅VK64石英-機械混能機芯，兼具機械「掃秒」同石英的準確。