Panerai最新推出Luminor Blu Mare 44mm腕錶 (PAM01085)，除咗借鑒品牌80年代經典，亦係首次以Officine Panerai (OP) Logo配藍色錶面之作。

「Blu Mare」意指藍色海洋，當然係為咗呼應品牌與大海、海軍等歷史，錶面亦用上品牌標誌性嘅太陽放射紋藍色錶面，配上6點時標上嘅80年代OP標誌；而數字時標嘅字體亦係源自上世紀末嘅Luminor腕錶，配上Super-LumiNova綠色夜光塗層，以現代技術演繹當年嘅風味。而Luminor系列標誌性嘅枕形錶冠就承繼自90年代嘅Luminor，線條簡潔俐落。

錶殼用上AISI 316L精鋼，抗腐蝕之餘亦為腕錶提供100米防水性能。入面則係一杖品牌自行研發嘅P.6000手動上鍊機械機芯，配備IncablocTM防震裝置，單發條盒提 供三日動力儲存。錶帶方面則附送米色縫線嘅藍色小牛皮錶帶配磨砂精鋼錶扣，另加一條藍色橡膠錶帶供替換。