有冇玩過啲IQ題，畀一堆重疊嘅三角型你，然後問你總共有幾多個三角型？如果你都係呢類問題嘅愛好者，咁Hublot出嘅呢隻Big Bang Sang Bleu II就啱你啦，畢竟佢仲係一隻錶，你可以一路數，一路計下自己用咗幾多時間先數得哂嘛！

Big Bang Sang Bleu II係Hublot與瑞士藝術家兼紋身師Maxime Plescia-Buchi合作，以其工作室「Sang Bleu」名義推出嘅第二隻腕錶。腕錶創作主題係「幾何交匯」——都唔使解釋啦？——但你又唔好以為佢個白色鏤空表盤啲三角形係純粹為咗靚，其實正中嘅上下兩層菱形就係時分針 (留意白色尖)，而左右兩個小針盤嘅指針亦係同類設計。令「睇時間」呢件小事變成生活中嘅藝術時刻。

Sang Bleu II有鈦金屬錶殼以及皇金 (King Gold) 錶殼兩個款，大小同為45mm，入面搭載HUB1240 Unico自動上鍊計時機芯。錶帶方面就係白色包黑邊嘅橡膠錶帶，再配與錶殼相當物料嘅錶扣。

鈦金屬款售價HK$189,900，皇金款售價HK$356,700。