雖然今年F1成績慘不忍睹，但剛過去嘅週日，法拉利於「主場」Mugello迎來車隊歷史上第1000場GP賽事，都絕對係一個值得紀念嘅日子。所以HUBLOT就推出每款全球限定廿隻嘅Big Band 法拉利 1000 GP 紀念腕錶。

圖片：HUBLOT

睇個名，你可能會以為呢隻錶一定又紅又黃咁，但實際上佢哋嘅外表都可以話幾低調。一款為拋光白金配鍍銠錶盤，再加上賽車手套皮革內襯黑色天然橡膠表帶，以代表車廠過去多年嘅榮光；另一款就用目前法拉利F1賽車嘅煞車碟同款碳纖維陶瓷，配SuperFabric穿孔式賽車表帶，代表車廠嘅現在與未來。最「法拉利」嘅部份，其實只係錶盤六點位置嘅躍馬Logo、以及日期標示底色換上「法拉利黃」。而錶底就寫咗「1000GP」以及鑄刻「LIMITED EDITION 20NU」字樣。

圖片：HUBLOT

而錶入面，就係HUBLOT自製HUB 1243自動上鍊飛返計時機芯，72小時動力儲存。買錶送個特製自動上鍊盒，以及由法拉利F1車手Charles Leclerc及下季離隊嘅Sebastian Vettel簽名賽車手套。