縱然政府嘅防疫要求越黎越高，但單睇市面上舉行嘅活動數量，就知其實唔少人都準備好回復正常生活節奏。而鍾情威士忌嘅你黎緊又有多個地方可以去，事關來自蘇格蘭Dufftown的The Singleton於尖沙咀開設期間限定店，介紹品牌歷史、工藝之外，買嘢仲免費送Cocktail。

威士忌工藝素來都係比較抽象，為咗展演The Singleton of Glen Ord酒廠嘅180年歷史，於K11 Musea開幕嘅期間限定店就用藝術裝置及互動體驗黎做賣點。例如門口個黃銅色裝置叫「Flavour Vortex」，象徵威士忌匯聚不同味道；然後就係倒吊大麥兼有大麥香嘅「Mirror of Earth」藝術裝置，再到模仿威士忌銅製蒸餾器內部嘅「The Copper Room」，了解品牌嘅獨有工藝。最後就係介紹其「雙桶工藝」嘅「The Oak Room」。

完成整個旅程後，大家就可以試下品牌嘅12年單一麥芽威士忌，當然亦可以即場購買，買咗仲可以於商場地下嘅Artisan Lounge換領由威士忌專家Tony Leung調製的The Singleton特別版雞尾酒1杯。

期間限定店由即日起至12月9日於K11 Musea一樓舉行。有興趣參加嘅大家，可以去官網預約。