一般潛水錶的防水能力大概為一兩百米，但絕大部份人隻潛水錶唯一掂到水嘅機會，就係去完廁所洗手嗰下。由此可見腕錶嘅潛水能力從來都不在「潛水時實唔實用」，而係展現品牌工藝有幾高超。既然如此，一百幾廿米呢啲「常規深度」當然就唔夠厲害。Rolex推出的OYSTER PERPETUAL DEEPSEA CHALLENGE，就一口氣將深度推到11,000米。

Deepsea Challenge由著名導演James Cameron於日前揭露，實際上腕錶嘅開發亦於佢有關。卻說2012年3月25日，James Cameron乘坐深海潛水器，潛入馬里亞納海溝（Mariana Trench）10,908米嘅深海，創下單人深潛紀錄。而當時潛水器機械臂上就有隻由Rolex製作嘅實驗型腕錶。而依家嘅Deepsea Challenge，就係以當日隻實驗腕錶為靈感而設。

直徑50mm嘅Deepsea Challenge由RLX堅固輕巧嘅鈦金屬製成，重量比當年嘅實驗版輕30%；配備能夠承受深海巨大水壓嘅勞力士專利Ringlock系統錶殼結構，再加上排氦閥門，於潛水員上升時釋放多餘氣體壓力以保護腕錶；Chromalight夜光物料則能夠散發持久藍色光芒，確保腕錶清晰易讀；錶帶配備Rolex Glidelock延展系統及蠔式摺扣延展鏈節，令腕錶可佩戴於厚達7毫米的潛水衣外。

蠔式錶殼內搭載3230型機芯，配備Chronergy擒縱系統、不受磁場干擾的Parachrom游絲，以及Paraflex緩震裝置等數個專利部件，全面體現勞力士精湛製錶技藝。發條盒的結構與擒縱系統的優秀效率，使3230型機芯的動力儲備增至約70小時。一如所有勞力士腕錶，Deepsea Challenge獲頂級天文台精密時計認證，平均誤差為每天正負兩秒以內。

錶殼底蓋刻有「Mariana Trench」（馬里亞納海溝）字樣及「23-01-1960」、「26-03-2012」兩個日期，分別向1960年海洋學家Jacques Piccard與美國海軍中尉Don Walsh駕駛里雅斯特號（Trieste）創造深潛紀錄、以及2012年，James Cameron駕駛深海挑戰者號（DEEPSEA CHALLENGER）創下單人深潛紀錄致敬。兩次探險均配備勞力士實驗型腕錶。

資料來源：Rolex