Horological Machine No6 ‘SV又係MB&F嘅作品，即係上星期Sherman鐘嗰間，「SV」係指藍寶石水晶版，鉑金X藍寶石水晶 version 全球限量10隻，紅金X藍寶石水晶又係全球限量10隻，價錢都係唔需要問啦，有錢都未必買到。

HM6 SV 錶殼由兩塊流線形貴金屬組成，夾起每邊兩個嘅「透明圓形露天廣場」。下方兩個有數字嘅球體垂直旋轉，分別用大font size數字顯示小時同分鐘。

上面兩個係水平旋轉嘅雙球型渦輪，由轉軸承與齒輪組驅動，可以自動調節上鍊系統，減少速度衝擊所造成嘅壓力同磨損。

中間主球體係1分鐘飛行陀飛輪，確保機芯精準報時。高清準嘅調節器，對潤滑油嘅黏性好敏感，但紫外線輻射會慢慢破壞潤滑油，為咗解決呢個問題，HM6就整咗個伸縮式半球面鈦金屬保護罩，玩家可以用9點鐘方位個錶冠控制保護罩，玩起上嚟就好似眨緊眼咁。

詳細啲講，成隻錶嘅焦點係全球限量100隻嘅HM6機芯，超過3年嘅研發期，鋁合金球型面盤顯示小時、時針，由金屬削到好似紙咁薄嘅極輕材質，進而實現於紅寶石軸承旋轉。

球型面盤同機芯基板呈垂直 90 度旋轉，呢種牽涉驅動齒輪及齒輪系嘅複雜程度，在腕錶設計上極之罕見。動力儲存達72小時。