呢排成日都有Vintage威士忌開始唔夠賣，搵到高年份威士忌要盡快入手之類嘅傳聞。年份對於威士忌嘅醇厚固然重要，但其實木桶先係靈魂所在。

威士忌嘅酒色、酒香、味道絕大多數都來自陳釀嘅木桶，如果個桶唔靚，同啲酒產生唔到優良嘅化學作用，俾你擺多兩個世紀都無用。呢度先要介紹兩隻極、極、極之常用嘅兩隻桶 : 美國橡木桶 (波本桶)、西班牙雪莉桶。

美國橡木桶

American Oak美國橡木桶，原料為美國白橡木 (Quercus alba)，又稱為波本桶，因為隻桶本身係用嚟陳釀美國嘅波本威士忌 (Bourbon Whisky)。美帝有法例規定，釀制威士忌必需用新桶 (Virgin)，用完係唔可以返用嘅。咁啲「有味」嘅2手波本桶去咗邊? 就係俾蘇格蘭、歐洲等國家買咗嚟用。

American Oak陳釀而成嘅威士忌，酒色較淺，呈現出一種蜂蜜金黃色，酒香基散發出椰子、奶油、雲尼拿、烘焙堅果等等，視乎個桶嘅烘焙程度，酒液更會有朱古力，Mocha咖啡、燒棉花糖之類嘅香甜味道。主要用American Oak嘅威士忌作品，風格必然係順滑香甜，平易近人，容易入口。

西班牙雪莉桶

相對於American Oak，European Sherry Oak 則用歐洲橡木 (Quercus robur)，用以釀製雪莉酒。雪莉酒係一種加強葡萄酒，經過陳年之後，風味相當濃烈，有厚重嘅口感，有少少白蘭地嘅香味，英國人就好常飲Sherry做餐前酒嘅。

雪莉桶本身用嚟陳釀極為深色嘅雪莉酒，將威士忌置入其中，會為酒液帶嚟較為深邃嘅酒色，散發葡萄、無花果、香料、胡椒、肉桂、黑朱古力、焦糖等等嘅風味。呢啲濃厚嘅香甜、香辛，既適合做Single Cask，又能夠同American Oak混釀，帶嚟更佳嘅層次同口感。

Sherry Cask 名作超級多，Macallan 12、Glendronach 12，甚至係Kavalan隻Sherry Solist都係極之迷人嘅作品。Sherry Solist為Cask Strength版本，酒精度高，能夠將Sherry Cask最原始嘅個性發揮出嚟，飲落口層次分明，非常複雜，焦糖、香料、布甸、餘韻悠長而有回甘，抵佢拎咁多獎嘅！

今次介紹咗呢兩隻桶，大家試威士忌嗰陣可以留意一吓。下回會同大家分享吓市面上嘅名酒點樣「玩桶」，陳釀嘅方式等等，記得留意！