話說Vinexpo響香港搞都有7年之多，從事Wine & Spirit相關行業嘅巴打應該都出席過佢地嘅活動。其實呢個酒展，主要係講世界葡萄酒、烈酒貿易市場嘅概況，有詳細嘅市場調查，分析近年各地酒類嘅銷售數字等等。呢啲資訊無論對業內人士，定係有心鑽研嘅飲家都相當重要。

2016年5月24至26日，將會有超過35個國家，共1,300多個參展商嚟到Vinexpo HK。芸芸嘅葡萄酒、烈酒品牌，今年嘅焦點會放喺‘Italian wines in Asia’，圍繞住呢個主題，大會將舉辦 conference、masterclasses、tastings，仲會請意大利名煮來港，為入場人士炮製Wine Pairing Cuisine。

相對於2014年，香港嘅葡萄酒銷售市場錄得1.4%升幅，其中Sparkling Wine汽泡酒佔咗最大比重。唔好以為汽泡酒就一定係傳統法國香檳，今次售銷額回勇，主要係靠西班牙Cava同意大利Prosecco，經濟實惠之選，實在吸引到包括我自由在內嘅一眾飲家。

宏觀市場都有整體復甦嘅跡象 (嘩，好似講緊股票)，當中低價葡萄酒嘅市場賣得最好，有成16.3%升幅，所謂低價即大約HK$100至150嘅葡萄酒。從呢個狀況，我地可以推論到，有一批新嘅飲家以低價酒接觸葡萄世界，平日飲餐酒嘅習慣亦都愈見普遍，同時，超市、酒類零售商愈開愈多，市民容易咗買酒都係事實。

紅酒仍然係葡萄酒之中最受歡迎，佔咗43.4%市佔，舊世界法國酒依然領放，但同其他國家嘅距離已經收窄。呢個都必然嘅，智利、西班牙、澳洲、意大利嘅酒咁靚，有時仲平法國酒一大截，勝在有高性價比。

烈酒方面，tequila、rum、gin都有正增長，尤其英美呢排有Gin Tonic、Martin嘅潮流，所以銷售量係唔錯嘅。威士忌嚟講，日威、Single Malt 單一純麥同美國 Bourbon繼續屈機。

http://www.vinexpo.com/en/ 有更詳細嘅資料，希望5月嘅時候見到大家!