利申先，我並唔係車仔球迷，但見到Glashutte Original隻新Senator Chronometer藍色錶盤都真係忍唔住叫返聲「Blue is the Color」。其實Glashutte Original系列玩藍色都出哂名架啦，典雅、沉實、辨識度高，擺響鐘錶之上，又係一隻好襯型男嘅顏色。

個霜粒效果係由德國Pforzheim錶廠反覆塗抹再晾乾，不斷重覆先整到咁靚。Senator Chronometer 採用咗白金錶殼，而錶圈就整到極為纖細，將優雅嘅氣質表露無遺。

錶盤設計既簡約大方，更加睇到好精密嘅細節。3點鐘位一個大日曆視窗，12點位係動力儲存顯示，中央偏上有個圓形晝夜顯示，粒小圓點於0600 – 18:00 會係白色，1800 – 0600 段時間會轉做黑色。6點位都係大家熟悉嘅小秒盤啦，唔多作解釋。

Calibre 58-01 手動上鏈機芯，搭載停秒機制，當你拉出錶冠嗰陣，時間顯示會暫停，秒針會返去原點並停止運作，分針會跳到下一個分鐘刻度。而當你轉個錶冠調較時間嗰陣，指針會 exact 跳去下一個分鐘刻度，維持咗分針與秒針嘅正確聯繫。

透明藍寶石水晶錶底蓋，可以睇哂四分之三夾板、螺釘黃金套筒、手工鐫刻擺輪等等部件，錶帶係Dark Blue路易斯安那州鱷魚皮錶帶搭配白金摺疊扣，同隻錶嘅設計簡直係夾到天衣無縫呀 !