江詩丹頓舊年趁260周年慶典，推出咗一款被譽為製錶史上最精巧複雜嘅時計，三位品牌製錶大師用足8年時間研發 — VC 57260，就係具備咗雙飛返指示、渾天儀式陀飛輪呢兩大複雜功能。今次呢隻Maître Cabinotier 系列，更加承繼咗57260優越設計。

VC 57260

品牌自家研發嘅深煙煤色NAC電鍍1990機芯，創造出全新嘅擒縱機關，以矽質嘅擒縱輪、擒縱杆加上耐用度極高嘅鑽石擒縱叉組成，有效減輕重量，亦能確保準確性。呢隻機芯有4項申請緊專利嘅原創設計，包括鈦金屬瞬時飛返系統、固定擺輪游絲嘅套筒、多框架陀飛輪、同先前提到嘅矽質擒縱杆。

45.7mm 18K白金機殼、配透明藍寶石水晶錶底蓋，錶面板橋見到拉絲打磨修飾嘅旭日紋同日內瓦波紋，時間指示分別位於雙層錶盤之上，鏤空咗嘅部位正好見到1990嘅機芯輪廓。

右邊半圓，飛返式分鐘、小時指針，鑲貼咗白金時標、黑色分鐘刻度，另一邊陀飛輪架構嘅秒針則圍繞住鍍銀刻度圈動。

左邊藍寶石水晶玻璃拱窗就係靚絕嘅渾天儀式陀飛輪，呢個名係來自18世紀法國鐘錶大師Antide Janvier製作嘅渾天儀式天文鐘。

陀飛輪圓環交織嘅觀同「天球儀」有異曲同工之妙。Maître Cabinotier嘅陀飛輪框架用咗超輕鋁合金，每轉動15秒就可以見到VC個馬耳他十字徽標。