Netflix 拍嗰套Daredevil其實幾好睇，劇情緊湊，打鬥拳拳到肉，好睇過唔少英雄劇。主角係一位雙目失明嘅律師，黑夜正正係佢最擅長嘅戰場，HTY嘅Skull Bad Boy 襯返佢平時有啲襤褸Feel嘅西裝look，相當之有玩味。

HYT一如既往，錶盤中間有個非常搶眼嘅Skull骷髏頭圖案，而呢隻錶最特別嘅就係液態顯示所用嘅黑色液體。之前喺H1 Full Gold都有使用，HTY嘅高科技結晶 — 光線無法穿透嘅黑液。

HYT每隻顏色嘅液體都有唔同特性，如果要改色，就要重新研究測試。佢地需要鑽研黑液獨有嘅化學性質，解決影響黏稠度、膨脹系數、抗紫外線特性等方面嘅難題，仲要確保運作時唔會附著喺導管壁、可以維持到導管內嘅凹凸面等關鍵要素。

光線無法穿過黑液，所以夜晚係睇唔到啲液體。Skull Bad Boy 與 H1 Full Gold 唔同嘅地方在於，前者無「Deducted Hour」夜光導管，所以夜晚真係無其他顯示方式。可能你會問，吓，咁都得? 整一隻唔整一隻? HYT行政總裁Vincent Perriard表示，Skull Bad Boy就係要玩黑暗嘅極致喎。

51mm黑色DLC鈦金屬霧面錶殼、經微噴砂處理，加上藍灰色磨面鱷魚皮錶帶，Rock味甚重。骷髏頭用咗新質料，Neuchâtel地區鐵匠將多層碳鋼反覆彎曲、折疊，鍛打256次，每個骷髏頭都獨一無二。骷髏頭嘅細小坑紋，係嚴密鑄造過程嘅證據。

同以前一樣啦都係，右眼動力 65 小時動力儲存顯示，耗盡嗰陣會變得黯淡，左眼係小秒盤，呢隻 Skull Bad Boy 全球限量50隻，賣HK$692,000。