有得嘆靚酒嘅時光係always happy，不過喺Happy Hour飲酒，相對較平，就更加暢快。出去飲咗咁多次Happy Hour嘅你地，有無諗過「歡樂時光」呢個名其實由邊度傳入嚟嘅，又本身有咩意思?

說法一 : Happy Hour起源於 40 幾年前紐約嘅一間酒吧，店主見到附近啲人多數都係下午時間放工，就貼咗張嘢話 5-6pm係Happy Hour，所有酒品半價。其他酒吧見佢做得好成功，就爭相仿效，最後流傳到去外國。

示意圖

說法二 : 60年代美國海軍特別設有自由娛樂時間，啲軍人可以響呢一個鐘頭入面放鬆吓，呢個時間就叫做 Happy Hour。啲軍人鐘意響Happy Hour去嗒返兩杯餐前酒，所以大家見到嘅歡樂時光都係食飯之前4-7pm左右。

U.S.S. Arkansas (BB-33)

說法三 : 又係美國軍，20年代，戰艦 U.S.S. Arkansas (BB-33)上面有堆人組織咗啲社交團體，叫「Happy Hour Club」、「Happy Hour Social Club」之類。佢地定咗啲時間一齊玩，一齊聽歌、跳舞、睇戲，總之就一堆娛樂活動，漸漸呢個時間就叫咗做「Happy Hour」，仲傳遍整個美國海軍添。

3個講法都來自美國，而可能性都相當大。其實20年代美國有單大嘢發生喎，大家有無印象? 無錯，就係美國憲法第 18 修正案，維持咗 13 年嘅禁酒令。當年好多州政府都禁止市民於限定酒吧或餐廳以外嘅地方飲酒，仲嚴格限制運輸、進出口、銷售等酒精相關業務，當時好多品牌都受到嚴重打擊。

禁酒令時代，正宗倒酒落海

說法四 : 社會嘅嘢，一向都係上有政策，下有對策架啦，市民為咗維護自己飲酒嘅權利，仍然係會偷偷地飲，佢地會去地下酒吧 (Speakeasy) 飲啲走私入口嘅酒液。Speakeasy入面，啲人會喺食飯前搞返個「Cocktail Hours」或者「Happy Hours」，因為食飯嗰間餐廳未必飲到酒 (你知外國人食飯必需酒架啦)。所以又有個講法，Happy Hour 由禁酒令時代嘅地下酒館度嚟嘅。

Happy Hour 最後變成今日約定俗成嘅習慣，定義為「餐前酒嘅折扣時段」，一般都係4-7pm左右，酒液多數都係 serve 啤酒、紅白葡萄酒、雞尾酒。不過生意難做，有啲酒吧索性全店 discount，毫無規限。香港一路都有Happy Hour呢個風氣，不過隨著都市人放工時間愈嚟愈夜，連食晚飯都變成宵夜，又真係好難有歡樂時光。