好懷念呀，Air King 個字樣好似好耐無見過，呢隻所謂嘅「空中霸王」係Rolex嘅傳統Product Line，個歷史甚至可以追溯到30年代，直到2014年，Rolex用Oyster Perpetual取代Air King字樣，我地仲以為「空中霸王」時代已經終結。

今次再喺Basel見到新Air King，有啲老朋友嘅感覺啦，以前嘅Air King比較細隻，錶盤34mm左右，而家個市場，好少男士會揀細錶架啦，所以Rolex都從善如流，將個錶殼整返做40mm，比較符合現代口味。

傳統大三針設計，錶盤上面無乜特別嘅功能或者顯示，甚至連日曆示窗都無，簡單到極點。阿拉伯數目字嘅分鐘顯示，用咗飛行軍錶常用嘅5分鐘刻度，3、6、9 呢幾個位用返Explorer嗰種大字小時刻度。

最搶眼係鮮綠色Rolex字配鮮黃色皇冠Logo，喺平實傳統嘅盤面之中算係有啲跳脫。904L鋼製錶殼，自家3131型自動上鏈恆動機芯，錶冠有旋入式雙扣鎖，達到防水深度100米左右，錶帶自然係經典蠔式三排鏈節。

喺有COSC天文台認證嘅加持之下，呢隻入門Air King賣緊HK$48,000左右，又係一個心動 + 行動價。