上星期啱啱試完呢隻新Glenmorangie Private Edition，印象非常之深刻，呢枝作品玩甜中加甜，牛奶糖香氣濃郁，細細個食糖嗰種滋味，竟然喺威士忌之中搵得到，怪唔得Glenmorangie將佢命名為「Milsean (Scots Gaelic語，意思係甜嘢)」。

玩桶一向係威士忌精萃所在，Milsean用返Glenmorangie Original嘅威士忌，再置於燒過嘅紅酒桶之中陳釀一段時間，從而得出如此香甜嘅風味。飲開Glenmorangie嘅朋友應該都知道啦，Original枝酒本身係行橙花、花香嗰類清爽風格，但玩多一重紅酒桶之後，Milsean變成第二樣嘢。

首先酒香係溫柔嘅牛奶糖甜味，甘蔗、檸檬糖，成熟漿果襯托少許香辛；入口嘅時候極為自然，柔和、甜潤，好似食糖咁輕鬆，但又不失馥郁醇厚，蜜餞、車厘子、香桃等水果香甜漸漸浮現，最後仍然係標誌性嘅薑味香辛風味，豐有層次；餘韻繼續帶出香辛，猶如黃糖嘅濃香伴隨縈迴。

Milsean完全展現出Dr. Bill嘅玩味風格，坦白講係有驚喜嘅，香甜濃郁，輕鬆寫意，就算少接觸威士忌嘅女士們亦一樣啱飲。唔想太heavy，唔想太辛辣，嘆杯Milsean neat保證唔會死錯人。

個人唔太建議加冰，會令香甜味道收縮得太緊要，反而加一兩滴水更好。Milsean現價大約賣HK$1,200左右，入返一兩枝剛剛好。