香港鐘意玩Tattoo嘅人真係比較少，唔知係咪專業紋身師唔夠多，朋友有興趣玩都搵唔到適合嘅門路 (網上睇得太多中伏圖)。但喺外國Tattoo就係一件好普偏嘅事，甚至連專業嘅鐘錶品牌，都想喺隻錶度玩一轉獨有嘅「紋身」喎！

Hublot最近聯同著名紋身大師Maxime Büchi發佈咗隻最新作品 : The Big Bang Sang Bleu。錶盤複雜得嚟非常規律嘅幾何設計，原意係希望闡釋達文西「Vitruvian Man」所表現嘅和諧同比例關係。

紋身大師Maxime Büchi

Hublot Big Bang 系列唔會陌生啦，咁點解叫Sang Bleu? 原來Sang Blue係Büchi一間倫敦紋身店嘅名，聽聞Kanye West仲成日去嗰度幫襯添。

45mm鈦金屬錶殼，錶盤係3個轉盤重疊嘅幾何設計，最外圈係小時刻度，內圈係分鐘刻度，但佢無指針運行，閱讀時間全靠最外圍嘅兩個多邊型轉盤嘅指示。

大家會見到9點50分位，會有兩個白色Superluminova尖端，嗰度就係時間標示。中間最細嘅轉盤自然係跟秒速轉動啦。

配襯黑色小牛皮錶帶，限量200隻。

Source : Hublot