少年中二病發作，本人對Excalibur總有難捨的偏愛，大個睇錶見到Excalibur呢個名，又有種如獲至寶 Feel，更難得係Roger Dubuis將Excalibur嗰種王者氣派同鐘錶工藝融合得渾然一體。Spider系列喻意整錶就好似蜘蛛織網，需要耐性、嚴謹、創新，不斷根據新環境去調整工藝，創製出新穎而複雜嘅圖案。

Excalibur Spider系列由2015年面世，今年又有兩隻好鮮色嘅Spider Single Flying Tourbillon出廠，一隻紅，一隻藍，繼續玩複雜幾何同鏤空結構，但今舖只有單體陀飛輪結構。

45mm 錶殼，厚度為13.75mm，兩款錶同樣搭載RD505SQ手動上鏈機芯，錶盤七點半位見到個極靚嘅飛行陀飛輪，鏤空設計之中見到凱爾特十字架形陀飛輪 框架，提供約60小時動力儲存。紅色錶款配黑色橡膠錶帶，藍色就配白色橡膠錶帶，兩款都相當型格。