威士忌係一種使用蒸餾技術製成嘅烈酒，酒液會被置入木桶陳釀，等酒液本身能夠同木桶發生關係 (化學反應呀)，溝出一啲豐富嘅味道，之後酒廠需要為裝瓶做準備，例如調控返個酒精度，同埋做冷凝處理 (Chill Filter) 等等。

冷凝處理係現代嘅過濾技術，早期嘅Scotch全部都係Non Chill Filtered，用非冷凝處理。發展一套新過濾技術，係因為釀製、熟成過程之中，威士忌會出現酯類、醇類、酚類等物質，當溫度慢慢下降，或者加水加冰嘅時候，呢啲酯類會漸漸凝結成白色嘅懸浮物，咁啲酒睇落去咪唔係好靚囉。

釀酒師就諗咗個方法過濾懸浮物，佢地索性喺裝瓶之前，將酒溫迅速降低至4度以下，等啲懸浮物穩定地凝固，之後用濾網過濾哂佢，留低純淨剔透嘅琥珀酒色，呢個過程就係「冷凝處理Chill Filtered」。

兩杯都係Ardbeg 10 非冷凝，無咁透徹嗰杯係加咗凍水，攤咗廿分鐘

其實啲白色懸浮物除咗有礙觀瞻之外，對健康係無乜影響嘅，但有啲買家見到就會淆底，驚自己買到品質有問題嘅假酒，所以酒廠多數都會採用冷凝處理。

不過，資深嘅威士忌飲家們就認為，威士忌應該保持佢原有風味，愈貼近木桶狀態愈好，所以 某部份酒廠仍然保留「非冷凝處理 Non-Chill Filtered」嘅作品。非冷凝威士忌酒精度會相對較高，一般會以 46% ABV 裝瓶，如果想見唔到懸浮物，呢個酒精度係室溫極限嚟。

雖然非冷凝威士忌仍然會於裝瓶前以濾網過濾，但佢無做冷卻步驟，使到威士忌本身嘅酯類、酚類物質得以最大程度地保留。呢啲物質可以令威士忌酒香、味道產生相當微妙嘅變化，如果濾走咗就好似太浪費，尤其係高年份原酒之中，釀酒師希望作品以最自然、最原始嘅狀態登場，飲家先可以細味到固中嘅美妙之處。

至於冷凝或非冷凝好飲啲，最緊要睇返自己味蕾，非冷凝酒精度一定較高，好多人會頂唔順，覺得太過辣喉，風味太過強烈，呢個時候不如飲返冷凝作品，又可以加冰，輕鬆舒服。