唔知大家去玩兩手嗰陣，興唔興戴、著啲嘢上身增強運勢? Corum 嘅Bubble Gaming限量版系列正正係玩呢範，特登每款出88隻，888，發發發，都係中華文化成日講嘅意頭嘢。今次5隻錶，分別係 8 Ball、Casino Chip、Dice、Joker同Roulette，有輪盤有小丑牌，你鐘意玩乜都得。

5款都係47mm不鏽鋼錶殼，Bubble系列經典嘅弧形超大水晶玻璃錶鏡，而第88號錶會換上紅金錶圈，除咗雙「8」數字，仲喻意「紅」運當頭咁話喎。

Bubble 8 Ball、Bubble Roulette，兩隻錶特點係個特製嘅立體錶盤，前者立體8號波突到好似就快破鏡而出，後者Roulette個輪盤嘅數字格仔、秒針白珠造工非常精緻。

Bubble Dice就玩心理嘅，錶盤兩粒骰仔，每一面都係6，6點位同3點位同時有大大個6字，喻意66無窮；Bubble Joker比較有藝術感，黑色PVD塗層鋼錶殼襯托玩味小丑半邊面，霸氣十足。

Bubble Casino型號嘅錶殼經黑色PVD塗層處理，錶盤本身就係一個一百萬籌碼，鐘意拎籌碼嘅玩家可能會更有感覺。各款1-87號錶大約港幣32,000至45,000不等，而88錶因為其獨特性，故未有價錢可以提供。最後都係要提醒玩家們，意頭嘅嘢非精密科學，小賭怡情唔好訓身呀。