人係一種好主觀，又好易受影響嘅動物，於品鑑領域之中，你需要憑自己嘅味覺、嗅覺，舌頭嘅觸覺去判別酒嘅好壞，但如果你知道隻酒來自於一級名莊，或者出產於特級田、甚或乎係出自著名釀酒師之手，咁你會唔會夠膽保證，自己嘅判斷仍舊中肯？

為咗去除一切不必要嘅資訊，品鑑嘅時候有一種方法叫盲品Blind Tasting，目的就係要你喺無任何線索嘅情況之下，都判別到酒液嘅狀況。呢種高手級嘅品酒方式，即使擁有多年修為都未必做到100%準確，已故英國著名酒商Harry Waugh，曾經被問有無調過撈亂波爾多同埋布艮地嘅作品，佢原文答案係話 “Not Since Lunch”，由於坊間太多中譯版本，無統一嘅講法，但大致嘅意思都係話「唔係無」。

Harry Waugh

Blind Tasting要就咁品鑑出一隻酒嘅葡萄品種、年份係一件相當唔容易嘅事，即使俾埋個範圍 (Range)，要品出100%正確嘅答案仍需極為深厚嘅功力。盲品對於新興嘅酒莊係比較公平嘅，最出名都要數返 1976 年嘅巴黎盲品會事件。美國為慶祝建國200年於洲際飲店舉行咗一場品酒會，佢地希望以當時名不經傳嘅加州酒挑戰法國一級佳釀。

Judgement of Paris 巴黎品酒會

當時座上客都係代表法國葡萄酒業界嘅大人物，大會提供嘅法國作品都係頂級嘅名酒，出產自波爾多、布艮地，全部都係價值連城嘅夢幻級名作，品鑑之前，大家其實心入面都已經有結果，「法國一級佳釀會輸俾美國唔知邊度嚟嘅酒? 唔好玩啦！簡直令我地班酒評人 totally no mood to 品酒呀」

結果永遠都係出乎意料，紅酒冠軍係來自美國加州嘅鹿躍酒莊 (Stag’s Leap Wine Cellars)，而白酒由加州蒙特莉娜酒莊 (Chateau Montelena) 勝出，呢個咁驚人嘅結果，就如同今年電影《十年》贏咗金像獎最佳電影，又或者似係李斯特城贏咗英超一樣咁震撼。

之後新世界嘅作品亦漸漸登上國際舞台，應該話咁樣先有新世界同舊世界嘅分庭抗禮，美國、智利、澳洲、紐西蘭、南非，好多新品佳釀都已經變成世界名牌。各位飲家如果覺得自己有返咁上下經驗，不妨試吓踏入盲品嘅領域，俾個Range 自己，可能3-5枝同系列嘅酒，試吓估返每枝酒嘅正確答案，久而久之，你會領略到盲品其實有一定嘅邏輯同套路可以跟，呢個遲啲再講。