上次喺四季見到舒米高同雲尼亞里live chat，都知佢地有景轟架啦 (唔係講緊兩位叔叔，而係 Tag Heuer 同雲尼亞里)。雖然摩佬話Ranieri係失敗者，但大家有眼見，風水會輪流轉，成敗得失，並不能以一時論斷。

Claudio Ranieri，曾經教過費倫天拿、摩納哥、羅馬、華西、當然仲有車仔，嚟到李斯特城之後，先係帶領球隊護級成功，再奪得今年英超冠軍，呢個神話應該都係有今生無來世架啦。轉個頭睇返狂人摩佬，而家閒賦在家，車仔仲要無緣前8，成為英超歷史以來，成績最差嘅衛冕冠軍。

紀錄係要嚟破嘅，唔想重蹈車仔嘅覆轍，咁雲尼亞里就一定要諗諗計，先唔好俾人拆骨，再補充返啱用嘅球員，更強後備兵源，唔駛一味靠華dee、Okazaki、馬列斯。要長期成為爭冠份子並唔容易，贏完一屆壓力會更加大，不過，學Tag Heuer 話齋 #DontCrackUnderPressure，男人就係要無懼挑戰。