德國錶一向我心水之選，真正工藝之國，由重工業至精細腕錶，樣樣都位處世界頂尖位置，Glashütte Original更加係其中嘅佼佼者。Senator Cosmopolite 喺上年秋季問世，經過一輪又一輪嘅等待，而家終於嚟到香港！

號稱為旅行者之時計嘅Senator Cosmopolite，最大賣點一定係新款Calibre 89-02自動上鏈機芯加37揀2自助時區機制，架構複雜，但依然保持到簡潔嘅操作模式、清晰可讀性高嘅錶盤設計。

時區環一共有37個世界時候俾你揀，上面寫住3英文字母組成嘅IATA (國際航空運輪協會) 編碼，大家平時買機票，見到香港機場會寫住HKG，呢個係IATA Code；而近來因行李門事件好Hit嘅 ICAO (國際民航組織) 係有另一套4字母編碼，例如香港機場係寫VHHH嘅。平時做乘客睇慣IATA，無疑係比較方便嘅。

Senator Cosmopolite 用顏色去顯示GMT 時差區。24 個同格林威治標準時間 (GMT) 存在 1 小時為單位時差嘅時區，會於8 點鐘位置嘅夏令時間 (DST)，或標準時間 (STD) 視窗顯示黑色 IATA 編碼。10 個同GMT存在以 30 分鐘為單位時差嘅時區，會以藍色IATA代碼顯示。剩返3個同GMT差以15分鐘或45分鐘為單位時差的時區，就會用紅色 IATA 代碼顯示。呢個方法係一目了然，但對於色盲或者色弱人士，可能就唔係太實用啦。

37個時區，揀兩個，分別目的地時間同家鄉時間，錶盤中心時針同分針、6點位置一個小秒盤、9 點位晝夜視窗，4 點位標誌性大日曆，全部用於顯示目的地時間。而8 點位置兩個窗仔，上面講咗，用以顯示目的地所在時區採用夏令時間 (DST)定標準時間(STD)。

72小時動力儲存用黑白色呈現，DST、STD 則用黑、白圓點標示，腕表面頭係雙面防反光弧形藍寶石水晶錶鏡，背脊藍寶石水晶底蓋，睇到佢隻新Calibre 89-02 Automatic，仲有格拉蘇蒂直條飾紋、偏心自動擺陀上面嘅Double G 標飾，藍鋼螺絲，同埋電鍍處理嘅手工雕刻擺輪夾板。

44mm磨砂或拋光處理嘅紅金、白金錶殼，搭配黑色或藍色路易斯安那鱷魚皮錶帶以及紅金或白金折疊錶扣。