計返起George Clooney佐治古尼今年都55歲，男人去到知命之年，已經係陳釀已久嘅葡萄酒，魅力十足。近排睇埋佢主演嘅《華爾街綁架直擊Money Monster》就更覺有型。故仔講述George Clooney飾演一個財經節目Money Monster嘅主持，向來都吹水唔抹嘴，有日喺節目度推介咗隻老千股，搞到好多人傾家蕩產，最後梗係俾人上門尋仇啦。

劇情其實幾Straight Forward，有睇過韓片《恐怖攻擊直播》就會覺得好熟悉，一樣係電視直播犯罪嗰種緊張感，噢，又講遠咗，唔係影評Post唔講太多，總之《Money Monster》都係一部非常值得入場嘅電影，反思咗華爾街 V.S. 小市民嘅金融生態。

George Clooney喺片中嘅設定係人氣極高嘅主持，有錢、成熟、冷靜，能夠隨機應變，控制場面，齋睇已經相當吸引。電影之中佢一直戴住隻好閃吓嘅金錶 (職業病係睇呢啲)，一舉首，一投足都係霸氣外露。換轉係強國大叔做呢件事，你一早已經話佢土豪味濃，但到George Clooney戴，你會覺得，Oh, he deserves it!唔係因為佢特別靚仔，而係因為佢已經去到能夠駕馭物質、財富嘅年紀同層次。

唔多賣關子，佢戴緊嗰隻金錶係Omega Gold Speedmaster Moonwatch Professional Chronograph，42mm錶殼，18K金，搭載經歷過月球之旅Omega 1863手動上鏈機芯，有小秒針、測速計、計時功能。腕錶既有奢華嘅外殼，亦有重視功能性嘅設計，出得廳堂，又經得起考驗，就好似電影入面George Clooney俾人用槍、炸藥背心挾持，一樣可以做場Good Show，呢啲修為，去邊度搵呀。

揀一隻適合自己嘅錶，可以試問自己 Do I deserve it? 有無咁嘅器量、年紀、財富去戴呢隻錶? 還記得前一陣子，有幅地鐵小學生 (兩個) 戴Rolex嘅圖，雖然無鑑定過隻錶真定假，但旁人一睇，就會好自然感覺到唔match。鐘錶有極多品牌、極多款式，總有一隻靚錶係而家嘅你值得擁有嘅，不必抄人，不必勉強。