Richard Mille 拿度系列最出名嗰隻，應該係RM27，號稱史上最輕嘅陀飛輪錶，連錶帶都唔夠20克重，但大家都知前排MontBlanc TimeWalker Pythagore Ultra-Light Concept 已經取代咗佢最輕嘅位置。不過唔緊要，對一個網球手嚟講，敏捷並不是單一重點，火熱、無堅不摧嘅鬥志、爭勝心都好重要，所以RM就整多隻 RM35-02俾拿度。

火紅色錶殼所採用嘅係紅色Quartz-TPT物料，由每層不超過45微米嘅纖維於高溫高壓下壓製而成，極之堅固，又帶有抗敏特性。機芯強勁係一定嘅，之前拿度戴過RM27打波，個陀飛輪都安然無事，RM35-02亦繼承啫呢個特性。

機芯嘅Plate、Bridge都經過Titalyt鍍層嘅5級鈦合金、噴砂、PVD處理，極之堅固，令腕錶可以承受足足5,000G嘅衝擊力，好適合爆炸力強嘅拿度。不過，可能係我地同鬼佬有文化差異，呢隻紅、呢隻黃，除咗諗起某間美國連鎖快餐店之外，唯一諗到嘅就係「中國超人」，係得佢地先會呢個配搭，你試幻想吓加幾粒黃色星星上去，成件事即刻明哂。