Cocktail 除咗要好飲，玩味感覺都好重要，成個概念、風格，及至個Presentation都主宰我肯唔肯俾百幾蚊去試嗰一杯酒。講真，試酒呢，就一定有機會中伏嘅，但以我嘅經驗，去中環VEA或者The Envoy，搵Amanda、Antonio、Leszek呢啲大師級人馬嘅作品，想中伏都幾難。今個夏天，佢地又有一堆新作，而家睇睇搞邊科先！

新系列Cocktail包括有 No Tuscan Memoir (HK$118)，一杯以意大利番茄同雲尼拿製成嘅清新雞尾酒。

My Neighbor To-taro (HK$128)，非常親切，又好有小朋友玩味嘅作品，紫薯、咖啡，上面加個好似雪糕新地嘅special feature，絕對係人見人愛。

The Ginseng Hunter (HK$118) 玩一吓韓風熱潮，用料包括韓國梨、人蔘氈酒同有汽黑茶，有人蔘味嘅雞尾酒，你又試過未?

Down The Rabbit Hole (HK$128)，個味似係蜜瓜、香蕉嘅嗰種香甜，整個真。大白兔糖紙嚟做裝飾，係咪諗起以前懷疑層透明衣紙食唔食得嘅年代?

Sweet 甜味系列之中，Throwing Apples (HK$110) 係解渴妙品，混合日式高湯味伏特加、蘋果同白啤酒嘅滋味。

Aguas Frescas El Polican (HK$120) 加入了誘人嘅材料，包括解渴嘅羅望子同香氣襲人嘅玉桂，呢度風味，平時接觸嘅機會唔多，可以一試。

Savoury 鹹味系列Le Bries (HK$130) 嘅組合有啲驚喜呀，包括西瓜、荔枝、血橙，以及一片被大蔥煙燻過嘅芝士。不過懷疑，芝士係精髓所在。

Shiitake & It (HK$120) 由經典嘅Gin & It 演化而成，迷人嘅苦艾酒基底雞尾酒配以日本香菇粉末。

Sour 酸味系列，自家製的爆谷夏威夷果威士忌加辣肉腸片混合而成嘅Darth & Sour (HK$120) 構成咗甜、酸、鹹味嘅3D立體感

Pickle Back (HK$180) 則採用一份愛爾蘭 Jameson 威士忌，配合剌激味蕾嘅酸瓜汁，再加一小撮脆口碎酸瓜，一流！