Maximilian Busser & Friends (MB&F)，一個非常破格嘅高級鐘錶品牌；Alain Silberstein，一個創意十足嘅設計大師，兩個人嘅合作創造出幾年前嘅 HM2.2 Black Box，最近佢地竟然返兜經典 Legacy Machine No.1 Silberstein，再次進化推出市場，等班錶迷又再驚喜一次。

大家都知道 MB&F 同 Silberstein 兩者性格都極為天馬行空，時間顯示喺佢地眼中係一件無固定形態嘅藝術品。前者曾經同中國雕塑家夏航合作，將LM 1 整多個 Mr.Up 同 Mr. Down，就好似星期一嘅你同星期五嘅你咁，用人嘅精神狀態表示腕錶嘅動力。

今次Alain Silberstein版本嘅LM1，主打色彩繽紛嘅個性、形狀，睇落去好似細路仔玩嘅積木咁，充滿童真感覺，紅、黃、藍色又好鬼跳脫過癮，所謂玩味咪係呢啲囉。

另一個改動出現於支撐擺輪嘅兩條眉毛 (拱形橋板)，呢個版本索性改做一條過嘅藍寶石水晶架橋，而家眉心嘅擒縱系統都可以清楚見到。特大三角形箭嘴表示時間，無咁搶眼嘅藍色牙籤仔做指針，兩個對比咁強烈都係 Silberstein用心之處。

LM 1 Silberstein 有分玫瑰金、鈦金屬、黑色 PVD 鈦金屬，各限量12隻。