Corum之前一隻海軍上將錶，唔係話唔靚，但睇落總係有啲唔係好對路嘅感覺，直到佢最近出一隻 47 Automatic 先恍然大悟 : 「Size問題！」 上一隻玩藍面嘅 Legend 42 Automatic，只有 42mm錶盤，而有大約一半嘅面積堆滿航海旗，相比 47 Automatic 顯然差咁一份空間感同霸氣！

海軍上將錶最緊要豪邁，47 Automatic 終於行返一次簡約風，識得將精彩嘅部份顯露於細節之中，盤面仍然大部份留白，噢，呢隻啞黑色錶盤應該係「留黑」，睇落去舒服啲，可讀性亦更加高。

標誌性12邊形錶圈，錶殼用鈦金屬製，中間用夜光太子妃鏤空指針，彩色航海旗縮哂去外圈做小時刻度，令灰黑色配搭之中都有啲點綴。透明錶底蓋，可以睇到 CO403 自動上鏈機芯，基本功能時、分、秒，同埋日期顯示，提供到 65 小時動力儲存。

連埋黑色硫化橡膠錶帶、三重折疊扣，Admiral’s Cup Legend 47 Automatic SRP 係 HK$41,500，比起 42 Automatic 貴約一萬港紙。