上次親身品嚐 Palmer 酒莊嘅精選作品，深深感受到其非凡魅力，難得Tasting之中，有《神之水滴》提及嘅Palmer 1999，第一次見真身，梗係要加倍留意啦。簡單啲講，漫畫以「母親」去形容枝酒，係取其柔滑如絲嘅溫婉口感，好似老媽子咁溫柔，但枝酒真正嘅價值，係在於佢將 Cabernet Sauvignon 發揮至一個新嘅層次。

必先要強調，Palmer 1999 係一枝非常好嘅作品。佢對上一年，98係收成極好嘅一年，所有葡萄酒都超班，唯獨 Palmer 呢枝作品，99年係可以媲美98，甚至擁有比98更高嘅稱譽，可想而知其質素之高。99 年混釀比例為 48%Cabernet Sauvignon、46% Merlot、6% Petit Verdot，赤霞珠比例只係稍高，但演出效果卻係超乎想象咁好。

99 年葡萄種植期為 9月17日至10月1日，當年春夏之間，氣候保持溫暖而潮濕，夏季時期葡萄成熟轉色嘅情況非常理想，其過程之完美令佢產生前所未有嘅甜度 (Sugar Level)。99 年 Cabernet Sauvignon 含糖量亦係歷年之冠，破盡紀錄，形成非常易入口，但又極具力量、味道豐盈嘅傳奇級風味。

聞香之時，香甜嘅誘惑已經撲鼻而來，櫻桃、紅莓、香料、煙草，甚至少許嘅皮革味道都帶住甜美嘅點綴。入口瞬間被其絲滑質感所馴服，酒體經過味蕾嘅感覺係非常之舒服，酒液散發出豐盈嘅果香，仲有極為溫柔嘅單寧，平衡優雅，風味集中而擴散範圍極廣。即使撇除層層探究嘅超複雜個性，Palmer 1999 之香甜、溫柔已足以令佢成為飲家夢寐以求嘅美酒。