前排The Balvenie 全球品牌大使 Sam Simmons 嚟咗香港，親自主持《The Balvenie DCS Compendium》同 1978 年珍稀威士忌嘅品鑑會。當日 Sam 形容可以為 David Stewart 呢個威士忌傳奇編撰傳奇，將佢嘅心得同技術傳承於後世，係一件非常之光榮嘅事。其實威士忌界就係咁，傳統、發展，兩者係相輔相乘，我地今日先會飲到啲咁靚嘅作品。

Sam Simmons

David Charles Stewart (DCS)，呢位號稱全行最資深、最Modest嘅釀酒大師，有研究威士忌嘅朋友都會聽過佢嘅大名。事關就係佢當年發明「Double Wood」過桶收結技術，經多年嘅研究同發展，啲威士忌先變得咁複雜，咁多風味。而所謂過桶收結，即係將啲威士忌置於A橡木桶 (例如美國橡木桶) 若干年，於裝瓶之前再擺落另一種B橡木桶 (例如歐洲雪莉桶) 幾個月去做個 FINISHING。啲威士忌就會同時具備兩款橡木桶嘅風味。

《The Balvenie DCS Compendium》一共五章，每章都會連埋5款The Balvenie嘅珍稀佳釀 (9、17、30、37、46)，呢一章加5款威士忌嘅套裝，全球只有50套，而獨立發售 The Balvenie 1978年，全亞洲更加只有90枝，Rare 嘅程度完全係超乎想象。

The Balvenie 1978年，一款37年嘅老酒，ABV 50.2%。作為第一章嘅其中一部份，呢隻酒演示咗品牌點樣喺不同年份，發展出不同嘅個性，1978 有豐富嘅麥芽、拖肥、雲尼拿香甜，伴隨住奶油、蜂蜜嘅風味，入口係濃郁嘅蜂蜜糖漿，奶油糖果、雲尼拿同肉桂香辛，由美國橡木桶帶來嘅甜美，同時令收結更輕柔和諧。