蘇格蘭威士忌廠 Tomatin 最近公佈咗Warehouse 6 Collection系列嘅新品，Tomatin 1971單一純麥威士忌。蒸餾程序始於1971年嘅8月1號，44年後嘅今日終於面世，全球限量252組，大約賣US$3,250，即二萬幾港紙。

超珍稀嘅1971年來自精選嘅西班牙Oloroso雪莉桶，豐富嘅口感、風味，以多年嘅陳釀帶來更多複雜性同層次。繼上年Tomatin 36年之後，又係一款能夠代表酒廠個性嘅Ultra-premium威士忌。2016年5月裝瓶，以Cask Strength形式盡量保持酒液原有味道，ABV達到45.8%。

既然係靚酒，點可以無奢華嘅包裝襯托? 一個Whole Package，周邊嘅「配套」亦要做得好好睇睇，明顯Tomatin深明此道。1971年以手製水晶作為酒瓶，上面有銅圈做裝飾，連同兩隻水晶酒杯，優雅地安放於精緻嘅木盒之上，Tomatin 字樣同標飾都係用Rose Gold去做，氣派十足!