以外觀設計而言，Glashütte Original嘅溫文爾雅無疑係男士們表現優雅風格嘅最佳選擇；若以精密機械嘅高超水準嚟睇，GO 亦係世上首屈一指嘅鐘錶製造商。新出嘅3款Senator Excellence，繼續沿用經典嘅簡約設計，但功能性上則有更卓越嘅表演，難怪令不少行家心動。

Senator Excellence搭載一款自家製Calibre 36機械機芯，令腕錶於穩定性、精準度同運行時間上面都有所提升。首先GO嘅開發團隊刻意將機芯零件盡量減少，拎走容易磨損同老化嘅部份，例如放棄上鏈系統之中嘅止動棘爪 detent click，其功能改以雙向上鏈減速齒輪bi-directional wind reduction gear執行。而創新嘅卡口座設計，可以將機芯穩委固定於錶殼之內，提高結構抗震性，更易保養同更換配件。

GO 嘅另一個第一次係使用矽製游絲，國際間咁多名錶都用佢，係因為呢隻物料可以令纖幼嘅游絲有效抵禦磁場、溫度變化嘅影響，實現更高水平嘅等時擺動。另外Calibre 36 改良過嘅輪系亦提供更佳嘅運行穩定性。

Calibre 36機芯另一個強大嘅地方係以單發條盒，提供達至少100小時嘅動力儲存，於GO系列又係首創。品牌以更長直徑、更細嘅發條軸，令發條長度延伸至680mm，大幅增加上鏈圈數，新物料Elinflex同時確保上鏈時候唔易出現斷裂嘅情況。而傳動比率嘅 efficiency 可以話更為重要，Senator Excellence 100小時嘅動力儲存只需要轉1,900圈，非常高效。

3款Senator Excellence，精鋼錶殼配銀色或黑色錶盤，賣HK$71,500，而紅金版則賣HK$130,000，分別配襯黑色路易斯安那鱷魚皮錶帶，或黑色小牛皮錶帶。